दशैँसँगै चाडपर्वको
माहोलले नेपाली समाजलाई झ्याप्पै छोएको छ । चाडपर्वमा घरहरु रङ्ग्याएर चिटिक्क
पार्ने हाम्रो नेपाली परम्परा छ ।
सेतो कमेरो
वा रातो माटोले घरको भित्री र बाहिरी भाग लिपपोत गर्ने परम्परा अब क्रमशः आधुनिक
हुँदै गएको छ । घरहरु पनि परम्परागत ढुंगा माटोका सट्टा आधुनिक बन्न थालेका छन् ।
त्यसैले, घर रङ्ग्याउने तरिका पनि अब परम्परागतबाट पेन्टस्
कम्पनीका आधुनिक ‘कलर’हरु लगाउने तर्फ ‘ट्रान्सफर’ भइसकेको छ ।
आजभन्दा करिब
५ वर्ष अगाडीसम्म रङ्ग उत्पादक कम्पनीहरुले दशैँ र तिहार जस्ता चाडपर्वमा धेरै
व्यापार गर्थे । तर,
अहिले परिस्थिती
फेरिएको छ, मान्छेहरुले घर रङ्ग्याउन दशैँ तिहार
कुर्न छाडेका छन् । आवश्यकताका आधारमा जुनसुकै सिजनमा पनि घरमा रङ्ग लगाउन थालिएको
छ ।
त्यसकारण, पेन्टिङ कम्पनीहरुको ब्यापार अब ‘सिजनेवल’ मात्रै
छैन, बाह्रै महिना सिजन बनेको छ ।
कन्स्ट्रक्सन
नहुँदा माग छैन
एभरेष्ट कलरका प्रवन्ध निर्देशक तथा प्रमुख कार्यकारी अधिकृत (सीईओ) सरोज लुइटेल
विभिन्न कारणले करिब २ वर्षदेखि व्यक्तिगत आवास निर्माणका काम अपेक्षाकृत रुपमा
हुन नसक्दा रङ्गहरुको माग खासै नरहेको बताउँछन् ।
बैंकिङ
प्रणालीमा लगानीयोग्य रकमको अभाव हुँदा यसको असर आत्मनिर्भर भइसकेको पेन्टिङ
पेन्ट्स उद्योगहरुमा पनि परेको उनको भनाइ छ ।
‘पेन्टिङ भनेको जति धेरै कन्स्ट्रक्सन
भयो, त्यति नै खपत हुने चीज हो, सँगै यो लक्जरियस चीज पनि हो,’ लुइटेलले
बिजपाटीसँग भने,
‘अहिले मान्छेहरुसँग
पैसा छैन, तरलता अभाव छ । यसका कारण नयाँ घरहरु
बनेका छैनन् । नयाँ घरहरु नबन्दा पेन्ट्सको माग खासै छैन ।’
उनका अनुसार
एक पटक रङ किनेर लगेर लगाउनेहरु भन्दा नयाँ घरमा लगाउन रङ खरिद गर्नेहरु बढी
हुन्छन् । नयाँ खरिदकर्ताले आफ्नो घरमा रङ लगाउन दशैँ वा अरु कुनै चाड कुरेर
बस्दैनन् । किनकी,
घर फिनिसिङ भएपछि नै
उनीहरुले रङ्गरोगनको काम सक्छन् । त्यसैले पनि अब दशैँ तिहारको अवसरमा मात्रै घरमा
रङ लगाइन्छ भन्ने ‘ट्रेण्ड’ समाप्त भइसकेको सरोजको अनुभव छ ।
उनका अनुसार
पहिला रङ लगाएका ४० देखि ५० प्रतिशतले मात्रै दोहोर्याएर वा त्योभन्दा बढी पटक रङ
लगाउँछन् । बाँकी ५० प्रतिशत ग्राहक भने नयाँ हुन्छन् ।
कमर्शियल
बिल्डिङमा भने अलिअलि चहलपहल छ
व्यवसायिक
भवनहरु तथा होटलहरुमा भने दशैँको बिदाको समयमा रङ्गरोगन गर्ने अभ्यास कायम रहेको
उनको भनाइ छ ।
‘कमर्शियल बिल्डिङहरुले, होटलहरुले लगाउँछन्, किनकी
उनीहरु भनेको व्यवसायिक क्षेत्र भयो,
व्यापार बढाउन पनि रंगरोगन
गर्ने नै भइहाले,’ सरोज सुनाउँछन्,
‘तर, अहिले एक डेढ वर्षदेखि मान्छेहरुको आम्दानी क्रमशः
घट्दो छ । ह्याण्ड टू माउथ (हातमुख जोर्न) मात्रै सोच्नु परेको छ । यस्तो अवस्थामा
व्यक्तिगत नयाँ घरहरु बन्ने कुरा सम्भव हुने कुरा भएन । पहिला रङ लगाएकाहरुका लागि
पनि अहिले अनिवार्य पर्दैन,
किनकी रङ अलिअलि
गएको न हो । रङ किन्दा हुने बराबरको खर्च उसले अरु बाध्यकारी काममा लगाउँछ ।’
