फागुन महिनामा घरजग्गा कारोबारमा खास सुधार आउन नसकेको देखिएको छ । भूमि व्यवस्थापन तथा अभिलेख विभागका अनुसार फागुन महिनामा ४९ हजार २८७ वटा घरजग्गा किनबेच भएका छन् ।
माघ महिनामा ४९ हजार २९० वटा लिखत पारित भएको थियो ।
फागुन महिनामा भएका घरजग्गा कारोबारमध्ये सबैभन्दा बढी इनरुवा मालपोत कार्यालयबाट कारोबार भएको छ । सुनसरीस्थित इनरुवा मालपोत कार्यालयबाट २ हजार ६ वटा घरजग्गा किनबेच भएको छ । जनकपुरधाम मालपोतबाट १ हजार ९९७ वटा, झापाको भद्रपुर मालपोतबाट १ हजार ८५० वटा, मोरङको बेलबारी मालपोतबाट १ हजार ६ सय ४३ वटा घरजग्गा कारोबार भएको छ । सप्तरीको राजविराज मालपोतबाट १ हजार ३६५ वटा, महोत्तरीको जलेश्वर मालपोतबाट १ हजार २८४ वटा र सर्लाहीको मलंगवा मालपोतबाट १ हजार ११४ वटा घरजग्गा किनबेच भएका छन् ।
फागुन महिनामा भएका ४९ हजार २८७ वटा घरजग्गा किनबेचबाट ३ अर्ब ९५ करोड ९८ लाख रुपैयाँ राजस्व संकलन भएको छ । माघको तुलनामा घरजग्गा किनबेच केही घटे पनि राजस्व संकलन भने केही बढेको छ । माघमा घरजग्गा किनबेचबाट ३ अर्ब ७१ करोड राजस्व संकलन भएको थियो ।
