.gif)
तनहुँ बन्दीपुर गाउँपालिकाले कार्यपालिकाको बैठक सिद्धगुफाभित्र सम्पन्न गरेको छ । पर्यटकीय तथा धार्मिकस्थलको प्रचारप्रसारका लागि गाउँपालिकाले प्रत्येक वडामा पुगेर कार्यपालिकाको बैठक गर्ने नीतिबमोजिम सिद्धगुफाभित्र बैठक बसेको हो ।
बन्दीपुर गाउँपालिका ५ विमलनगरमा रहेको उक्त गुफालाइ दक्षिण एसियाकै ठुला दाबी गरिएको छ । सिद्धगुफाको प्रचारप्रसार गरी पर्यटकलाई आकर्षित गर्ने उद्देश्यसहित कार्यपालिकाको बैठक गुफाभित्र बसेको गाउपालिका प्रमुख पुर्णसिं थापाले बताए ।
तनहुँको डुम्रेबाट दुई किलोमिटर पूर्व विमलनगरमा अवस्थित सिद्ध गुफा समुद्री सतहबाट ६०० मिटरमाथि विमलनगरको ठीक दक्षिण भागमा पर्दछ । विसं २०४४ चैत १३ गते स्थानीय बासीले पहिलोपटक यो गुफा पत्ता लगाएका थिए । यस गुफालाई तीन हजार ५०० वर्ष पुरानो मानिएको छ ।
गुफाभित्र फेला पारिएका पुरातात्विक प्राचीन वस्तु अक्षर मेटिएको तामाको पैसा, माटोबाट बनेको टुक्रीको पानीको घैटो, सुराहीको आधा भाग, पाला, धुपाउरो, पानस, जनावरको दारा र टेराकोटाको शुल्पा र सानो थाल आदि १६ र १७ औँ शताब्दी अघिको अनुमान गरिएको छ ।
गुफा अवलोकनका लागि आन्तरिक तथा बाह्य पर्यटक आउने क्रम बढेको सिद्धगुफा विकास समितिका अध्यक्ष लालकुमार श्रेष्ठले बताए ।
.gif)
