चितवनमा आजदेखि प्याराग्लाइडिङ उडान सुरु भएको छ । भरतपुर महानगरपालिका वडा नं. २९ को चौकीडाँडाबाट प्याराग्लाइडिङ उडान सुरु भएको हो ।
हिमालयन फन्टियर्स प्याराग्लाइडिङ कम्पनीले चितवनमा पहिलोपटक प्याराग्लाइडिङको व्यवसायिक उडान थालेको हो । कम्पनीका सञ्चालक शालिक दवाडीका अनुसार औपचारिक उद्घाटन पछि गर्ने गरी नयाँ वर्षको दिन पारेर आजबाट व्यवसायिक उडान सुरु गरिएको हो ।
चितवनको चौकीडाँडाबाट उड्ने प्याराग्लाइडिङ तनहुँको देवघाट गाउँपालिका–५ स्थित त्रिशूली नदीको किनारमा अवतरण हुनेछ ।
यहाँ प्याराग्लाइडिङमा उड्न ८ हजार शुल्क तोकिएको छ । व्यवसायिक उडानको सुरुवातको क्रममा २ हजार छुट दिइएको छ ।
अहिले १० जना पाइलट राखेर उडान थालिएको छ ।