नेपाल औषधि थोक व्यवसायि संघ केन्द्रीय समितिले नेपाल राष्ट्र बैंकले कोरोना प्रभावित ब्यवसायीलाई ल्याएको राहत प्याकेजप्रति असन्तुष्टि जनाएको छ। कोरोना प्रभावित व्यवसायीलाई २ प्रतिशत ब्याज छुट दिने लगायतका राहत प्याकेजमा आफुहरुलाई समावेश नगरिएको भन्दै संघले असन्तुष्टि जनाएको हो।
लकडाउन जस्तो विषम परिस्तिथिमा पनि काम गर्ने औषधि र औषधि जन्य सामाग्रीको कारोवारसंग सम्बन्धित व्यवसायीलाई राहत प्याकेजमा समावेश नगरिनु दुखद भएको संघका केन्द्रिय अध्यक्ष शिवराज बास्कोटाले जनाएका छन्।
'हामी तमाम औषधि व्यवसायी कुनै न कुनै बैकका ऋणि रहेको र विषम अवस्थाबाट पूर्णरुपमा प्रताडित रहेको अवस्थाप्रति केन्द्रीय बैक बेखवर रहनु आफैमा शुभ संकेत मान्न सकिन्न' संघद्वारा जारि बिज्ञप्तीमा उल्लेख छ।
अन्य व्यवसायीहरुलाई दिइएको राहत प्याकेज औषधि र औषधि जन्य सामाग्रीको कारोवारसंग सम्बन्धित व्यवसायीलाई नदिँदा औषधि व्यवसायीको आत्माबल र उर्जामा नैराश्यता पैदा गर्ने संघको दाबि छ। यस्तै विभेदकारी निर्णय हुँदै गएमा भोलीका दिनमा व्यवसायीले व्यवसाय बन्द गर्नु पर्ने अवस्था समेत सिर्जना हुने संघले चेतावनी दिएको छ।
तीन महिनाको लागि २ प्रतिशत ब्याज छुट पाउने व्यवसायीहरुको सुचिमा औषधि र औषधि जन्य सामग्रीको कारोबार गर्ने व्यवसायीलाई पनि समेट्न संघले आग्रह समेत गरेको छ।
