फिटवेल गार्मेन्ट प्रालीले निषेधाज्ञामा पनि रक्तदान कार्यक्रमको आयोजना गरेको छ। बजारमा रगतको अभाव भयो भन्ने थाहा पाएपछि निषेधाज्ञाको समयमा पनि जोखिम मोलेर रक्तदान कार्यक्रम आयोजना गरेको कम्पनीका संचालक मनोज कुमार भारतीले बताए।
काठमाडौँको नागार्जुङ नगरपालिका वडा नम्बर ६ स्थित गार्मेन्टको आँगनमा नै गरिएको रक्तदान कार्यक्रममा करिब ४२ जनाले रगत दिएका जनाइएको छ। राष्ट्र युवा परिषदका कार्यकारी उपाध्यक्ष माधव ढुंगेल, नागार्जुन नगरपालिकाका मेयर मोहन बहादुर बस्नेत, उपमेयर शुशिला अधिकारी रक्तदान कार्यक्रमलाई हौसला दिन कार्यक्रत स्थलमा पुगेका थिए।
बजारमा देखिएको रगतको अभाव पूरा गर्न सामाजिक दूरी कायम गरी रक्तदान कार्यक्रममार्फत रगत संकलनमा सहयोग गरेको भन्दै संचालक भारती लगायत गार्मेन्ट कम्पनी परिवारलाई नै उनीहरुले धन्यवाद दिएका थिए । कोरोनाको लकडाउनमा बजारमा रगत अभाव भएको समाचार मार्फत थाहा भएपछि छोटो तयारीमै रक्तदान कार्यक्रम आयोजना गरिएको गार्मेन्टका संचालक भारतीले बताए।
लामोसमय कोरियामा काम गरेपश्चात स्वदेश फर्केर मनोज भारतीले गार्मेन्ट व्यवसाय संचालन गरेका हुन्। गार्मेन्टमा ७० जना कामदार छन्। यो निषेधाज्ञाको समयमा पनि भौतिक दुरी कायम राखेर सिमित काम भईरहेको संचालक भारतीले बताए। बिगत ७ बर्षदेखि संचालनमा रहेको गार्मेन्टमा सबै प्रकारका कपडा तथा आदेश अनुसार पोशाक तथा ड्रेस उत्पादन गरिने संचालक भारतीले बताए ।