सरकारले ७ दिनमा ५ वटा औद्योगिक क्षेत्रको शिलान्यास गर्ने भएको छ । नेपाल सरकारको समेत स्वामित्व भएको औद्योगिक क्षेत्र ब्यबस्थापन लिमिटेडका अनुसार नेपाल सरकारले यस अघि नै घोषणा गरेका औद्योगिक क्षेत्रहरुको शिलान्यास गरिन लागेको हो ।
जस अनुसार कंचनपुरको दैजी-छेला औद्योगिक क्षेत्रको प्रधानमन्त्री केपी शर्मा ओलीले फागुन १० गते शिलान्यास गर्ने भएका छन् । त्यस्तै ओलीले नै प्रदेश नम्बर १ को चीन-नेपाल मैत्री औधोगिक पार्कको फागुन १६ गते शिलान्यास गर्ने छन् ।
बाँकेको नौबस्ता औद्योगिक क्षेत्रको उद्योग मन्त्री लेखराज भट्टले फागुन ११ मा शिलान्यास गर्ने छ भने रुपन्देहीको मोतिपुर औद्योगिक क्षेत्रको अर्थमन्त्री विष्णु पौडेलले फागुन १३ गते शिलान्यास गर्ने कार्यक्रम तय भएको लिमिटेडले जानकारी दिएको छ । त्यस्तै उद्योग मन्त्री भट्टले नै फागुन १४ गते मयुरधाप औद्योगिक क्षेत्रको शिलान्यास गर्ने छन् ।
