.gif)
विद्युत सेवामा गुनासो बढेपछि नेपाल विद्युत प्राधिकरणले उच्च ब्यबस्थापकीय कर्मचारीहरुसँग छलफल गरेको छ । प्राधिकरणका कार्यबाहक कार्यकारी निर्देशक लेखनाथ कोइरालाले प्राधिकरणका उपकार्यकारी निर्देशक, बागमती प्रादेशिक कार्यालय, प्रणाली नियन्त्रण र ग्रिड बिभागका निर्देशकहरु, महाशाखा र उपत्यका स्थित वितरण केन्द्रका प्रमुखहरु र सम्बन्धित अन्य कर्मचारीहरुसंग छलफल गरेका हुन्।
प्राधिकरणका प्रवक्ता मदन तिम्सिनाका अनुसार देशभर बिद्युत प्रसारण, वितरण र आपूर्तिमा आएको भनिएको अवरोध तथा अनियमितता ( interuption) एवम् विद्युत उपभोक्ताहरुको मिटर रिडिंग र बिलिंगमा आएको जनगुनासो सम्बन्धमा छलफल भएको हो ।
छलफलमा प्रसारण, प्रणाली नियन्त्रण र वितरण कार्यालयका अधिकारीहरुले बाहिर प्रचार गरीएजस्तो पहिलेभन्दा बढी आपूर्तिमा अवरोध तथा समस्या आएको नभई वर्षापछिको यो समयमा लाइन मर्मत , bush cutting लगायतका निरोधात्मक ( preventive maintenance) किसिमका कामहरु भैरहेकोले आममानिसमा त्यस्तो गलत संदेश गएको हुनसक्ने ब्रिफिङ गरेका छन् । त्यस्तै पुरानो वितरण प्रणाली तथा सब-स्टेशनहरुमा बेलाबखत बिभिन्न प्राबिधिक समस्याले अवरोध (trip) आउने गरेको, यो पहिले पनि हुने गरेको र त्यसलाई तत्कालै प्राबिधिकहरु पठाएर मर्मत गरी यथासक्य चाडो बिद्युत सुचारु गरिने गरेको ब्रिफिङ गरेका छन् ।
छलफलको क्रममा यसबारेमा सबै सम्बन्धित केन्द्रप्रमुखहरुले उपभोक्तालाइ उपयुक्त सूचनाका माध्यमबाट अग्रीम जानकारी गराउन कार्यकारी निर्देशकले निर्देशन दिएका छन् । कार्यकारी निर्देशकले गुनासोलाइ निरुपण गर्दै सक्दो कुनै गुनासो नै नआउने गरी र आउदै गरेका ठुला चाडपर्वमा अनवरत बिद्युत आपूर्तिको लागि सबैले सबैले आ-आफ्नो जिम्मेवारी वहन गर्न निर्देशन दिएका छन् ।
.gif)
