.gif)
ब्यापारिक घराना एम. भि. दुगड ग्रुप अन्तर्गतको नासा हाइड्रो प्राइभेट कम्पनीबाट पब्लिकमा रुपान्तरण भएको छ । कम्पनीको २०७८/७/१५ मा सम्पन्न विशेष साधारणसभाले पब्लिकमा रुपान्तरण हुने प्रस्ताव पारित गरेकोमा २०७८/१०/५ गते कम्पनीले रजिष्ट्रार कार्यालयले पब्लिकमा जान स्वीकृति दिएको हो ।
पब्लिकमा गएसंगै कम्पनीको नाम नासा हाइड्रोपावर लिमिटेड कायम भएको छ । यस कम्पनीको अध्यक्ष मोतीलाल दुगड हुन् । उनी हाल सनराइज बैंकका पनि अध्यक्ष हुन् ।
हाल नासा हाइड्रोपावरले दोलखा जिल्लाको बिगु गाउँपालिका स्थित लाप्चे खोलामा १६० मेगावाटको लाप्चे खोला जलबिद्युत आयोजना निर्माण गरिरहेको छ । यो आयोजना निजिक्षेत्रको लगानीबाट निर्माण कार्य भईरहेको देशकै ठूलो आयोजना हो । आयोजनामा नेपाल बैंकको अगुवाईमा ९ वटा बैंक तथा बित्तिय संस्थाहरुले लगानी गरेका छन्। २६ अर्ब २० करोड लागत हुने उक्त आयोजनामा ९ वटा बैंक तथा बित्तिय संस्थाहरुले १९ अर्ब ६५ करोड भन्दा बढी लगानी गर्ने सम्झौता भएको थियो। आयोजनामा नेपाल बैंकले ५ अर्ब, नेपाल ईन्भेष्टमेण्ट बैंकले ३ अर्ब ५० करोड, कर्मचारी संचयकोषले २ अर्ब, राष्ट्रिय बाणिज्य बैंकले २ अर्ब, हिमालयन बैंकले २ अर्ब, लक्ष्मी बैंकले १ अर्ब ८८ करोड २५ लाख, नेपाल एसबिआई बैंकले १ अर्ब, बैंक अफ काठमाण्डौले १ अर्ब तथा कृषि बिकास बैंकले १ अर्ब गरी जम्मा १९ अर्ब ६५ करोड २५ लाख लगानी गर्ने सम्झौता भएको थियो।
कम्पनीले २०७९ श्रावणसम्ममा उक्त आयोजनाबाट ब्यापारिक उत्पादन सुुरु गरिने लक्ष्य राखेको छ।
.gif)
