जनवरी १ मा नेपाली टोपी दिवस मनाईदै, माइतीघर मण्डलामा बिशेष कार्यक्रम हुने

विगत तीन बर्षदेखि हरेक अंग्रेजी नयाँ बर्षको पहिलो दिन ( जनवरी १ ) लाई नेपाली टोपी दिवसको मनाउदै आएको जागरुक युवा अभियान नेपालले यस बर्ष पनि त्यसलाई निरन्तरता दिने भएको छ । नेपालीको पहिचान स्थापित गर्ने उद्देश्य अनुरुप यस बर्ष पनि त्यस अभियानले टोपी दिवस मनाउन लागेको हो ।

विगतमा दौरा, सुरुवाल र टोपीलाई नेपाली पोशाकका रुपमा लिने गरिए पनि पछिल्लो समय यसलाई नेपाली पोशाकको सूचिबाट हटाइएकोमा अभियानले त्यसको विरोध गरेको छ। साथै अभियानले नेपालको सबै प्रदेशलाई ईंगित हुने नेपाली टोपीलाई राष्ट्रिय पहिचानका रुपमा घोषणा गर्न समेत माग गरेको छ । 

अभियानका संयोजक घनश्याम श्रेष्ठद्वारा बिज्ञप्तिमा भनिएको छ 'स्मरण होस् हरेक देशको आ–आप्mनै पहिचानजन्य पोशाक हुन्छ । तर अहिले हामीसँग कुनै पहिचान नै छैन । नेपालमा सामुदायीक पहिचानको कुरा जोडतोडका साथ उठ्ने गरे पनि राष्ट्रिय पहिचान नै संकटमा पर्न थालेको छ ।'

टोपीले सिंगो नेपालको प्रतिनिधित्व गर्ने अभियानको ठहर छ। टोपीको माथिल्लो भागको चुचुरोले हिमालको प्रतिनिधित्व गर्ने, बीचको भिरालो भागले पहाडको प्रतिनिधित्व गर्ने र  सवैभन्दा मूनिको समथर भागले तराईको प्रतिनिधित्व गर्ने भएकाले नेपाली टोपीले सबै जाति तथा क्षेत्रको प्रतिनिधित्व गर्ने बताएको हो  ।

 
टोपी दिवसको लागि यस बर्षको नारा “हाम्रो शान, हाम्रो पहिचानः नेपाली टोपी अभियान” तय भएको छ । यस बर्षको कार्यक्रम अन्तर्गत आगामी आइतवार (१ जनवरी) का दिन राजधानीको माइतीघर मण्डलामा विहान ७ बजे भेला भएर प्रभातफेरी कार्यक्रम गर्ने संयोजक श्रेष्ठले बताए ।

त्यस दिन देशभर नै यी र यस्तै प्रवद्र्धनात्मक कार्यक्रम आयोजना हुने अभियानले जानकरी दिएको छ । त्यस्तै प्रवासमा रहेका नेपालीहरुले विविध कार्यक्रम आयोजना गर्ने भएका छन् ।

अभियानले प्रबर्दनात्मक कार्यक्रम अन्तर्गत प्रभातफेरीसँगै नेपाली टोपीमा सजिएर सामाजिक सञ्जालहरुमा आफ्नो फोटो राखेर यो दिवस मनाउन पनि अभियानले सम्पूर्ण नेपालीमा अपिल गरेको छ ।