.gif)
सामाजिक संजाल केहि दिन यता एक नवदम्पतिको फोटो भाईरल भईरहेको छ। उक्त फोटोमा एउटा सरकारी नम्बर प्लेटको गाडीमा नव दम्पतिले फोटो शुट गरिरहेको देख्न सकिन्छ । फोटोमा दुलाहा गाडी भित्र छन् भने दुलही गाडी बाहिर छिन् । दुलाहाले गाडी भित्रबाट गाडी बाहिर रहेकी दुलहीको हात समातेका छन् ।
फोटोमा सरकारी गाडी प्रयोग भएपछि यसको चर्को आलोचना र बिरोध भएको छ । केहिले विवाह प्रयोजनको लागि सरकारी गाडी प्रयोग गरिएको भन्दै यसको आलोचन समेत गरेका छन् ।
के हो वास्तविकता ?
फोटोमा भाईरल भएका दुलाहा महेश पण्डित र दुलही किरण लामा हुन् । उनीहरुले गत बैशाख ७ गते काठमाडौँमा प्रेम विवाह गरेका हुन् । विवाह समारोह कै क्रममा फोटोग्राफर अमृत सुर्खेतीले उक्त फोटो खिचेका हुन् । सुर्खेतीले आफ्नो स्टुडियोको फेसबुक पेज स्टार फोटो स्टुडियोबाट उक्त फोटो सार्बजनिक गरेका थिए । त्यहि फोटो अहिले सरकारी नम्बर प्लेटका कारण भाईरल भएको हो ।
फोटोमा देखिएको सरकारी गाडी भने सिन्धुपाल्चोकको मेलम्ची नगरपालिकाका मेयर डम्बर अर्यालको हो । मेयर डम्बर अर्यालका उनी पनि सोहि विवाहमा पुगेका थिए । उनी भन्छन् 'म विवाहमा गएको थिए, गाडी मैले चढ्ने गरेको नै हो, पार्किङमा राखेको बेला ड्राइभरले नाई भन्न सकेनछ र फोटो खिचेछन्, मलाई यसबारे धेरै जानकारी छैन'।
निजि प्रयोजनको लागि किन सरकारी गाडी प्रयोग गरेको भन्ने बिजपाटीको प्रश्नमा उनले भने 'नगरेर पनि के गर्नु ? कहिलेकाही हतार हुन्छ, समय धेरै हुदैन'। यस बिषयमा उनले थप केहि कुरा गर्न चाहेनन् ।
उता फोटोग्राफर सुर्खेतीले भने फोटो आफ्नो पेजबाट हटाईसकेका छन् । उनको आफ्नो पेजबाट हटेपनि फोटो भने भाईरल भई रहेको छ ।
.gif)
