न्याय परिषद्को बैठकले जिल्ला न्यायाधीश ओमकार उपाध्यायविरुद्ध मुद्दा दायर गर्ने निर्णय गरेको छ । परिषदले नक्कली शैक्षिक प्रमाणपत्रको आधारमा न्याय सेवामा जागिर खाएको दाबीसहित उपाध्यायविरुद्ध भ्रष्टाचार मुद्दा चलाउने निर्णय गरेको हो। शैशिक प्रमाणपत्र विवाद आएपछि उनी परिषद्मा काजमा थिए । न्यायाधीशविरुद्ध यस्तो मुद्दा पहिलो पटक दायर हुन् लागेको हो ।
त्यस्तै बैठकले जिल्ला न्यायाधीश विश्वमङ्गल आत्रेयलाई पदमुक्त गर्न प्रधानन्यायाधीशसमक्ष सिफारिस गर्ने निर्णय गरेको छ । उनले मलेसियाई भीसा प्रकरण (बायो मेट्रिक)मा ३ अर्ब बिगो सहित दायर भएको मुद्दामा ३ लाख धरौटीमै आरोपितलाई उन्मुक्ति दिएका थिए । उनी ललितपुर जिल्ला अदालतका न्यायाधीश थिए भने हाल परिषद्मा अध्ययनका लागि काजमा थिए ।
बैठकले अर्का जिल्ला अदालतका न्यायाधीश बाबुकाजी बानियाँलाई सफाइको मौका दिने निर्णय गरेको छ । उनी काठमाडौँ अदालतबाट परिषद्मा अध्ययनका लागि तानिएका थिए ।