स्पेनिस कोपा डेल रे फुटबलको उपाधि बार्सिलोनाले जितेको छ । एथ्लेटिक विल्बाओलाई ४–० ले पराजित गर्दै बार्सिलोनाले ३१औं पटक कोपा डेल रेको उपाधि उचालेको हो ।
१२ मिनेटको अन्तरमा ४ गोल गर्दै बार्साले कोपा डेल रेको उपाधि जितेको हो । यसअघि नै सर्बाधिक उपाधि जित्ने कीर्तिमान कायम गरिसकेको बार्साले पुनः एक पटक उपाधि उचाल्दै ३१ औं पटक कोपा डेल रे जित्ने कीर्तिमानी कायम गरेको हो ।
एन्टोइन ग्रिजमनले फ्रेन्की डी जोङको पासमा गोल गरी ६० औं मिनेटमा क्लबलाई अग्रता दिलाए । ६३ औँ मिनेटमा डीजोङ आफैंले गोल थपेपछि बार्सिलोना २–० ले अगाडी भयो ।
बाँकी दुई गोल भने सुपरस्टार लियोनल मेस्सीको नाममा रह्यो । मेस्सीका लागि यो सातौं कोपा डेल रे उपाधि हो ।
यो उपाधि बार्सिलोनाका प्रशिक्षक रोनाल्ड कोम्यानका लागि पहिलो हो । ला लिगामा बार्सिलोना तेस्रो स्थानमा छ । कोपा डेल रेको उपाधि उचालेपछि प्रशिक्षक कोम्यानले ला लिगाको पनि अन्तिम खेलसम्म उपाधिका लागि भिड्ने प्रतिक्रिया दिएका छन् ।
