संस्कृति, पर्यटन तथा नागरिक उड्डयनमन्त्री हितबहादुर तामाङले विदेशी लगानीकर्ताहरुलाई नेपालको पर्यटनमा लगानी गर्न स्वदेशका उद्योगी व्यवसायीहरूले समेत पहल गर्नुपर्ने बताएका छन् ।
मङ्गलवार नेपाल उद्योग परिसंघले आयोजना गरेको अन्तर्राष्ट्रिय सम्बन्ध र पर्यटन समितिसँगको अन्तरक्रियामा बोल्दै वैशाख तेस्रो हप्तामा हुने लगानी सम्मेलनलाई सफल बनाउन उद्योगी, व्यवसायीहरूको भूमिका महत्त्वपूर्ण हुने र अन्तर्राष्ट्रिय स्तरका लगानीकर्ताहरूलाई आह्वान गर्न आग्रह गरे ।
सबै मिलेर विदेशी लगानीकर्तालाई नेपालमा लगानी गर्ने वातावरण बनेको छ भन्ने महसुस गराउन सके लगानी सम्मेलन सफल हुने बताए ।
उनले उद्योगी व्यापारीहरूले होटल क्षेत्रमा ठूलो लगानी गरेको तर पर्यटकहरूको कमीले आफूलाई सुरक्षित महसुस गर्न नसकेको भन्दै सरकारले पर्यटन क्षेत्रका समस्या समाधानका लागि आवश्यक कदम चालिरहेको जानकारी पनि गराए ।
