.gif)
नेपाली काँग्रेसको १४औँ महाधिवेशन शुक्रबारबाट सुरु हुँदैछ । महाधिवेशनका लागि देशभरबाट प्रतिनिधि काठमाडौँ आउने क्रम जारी रहेको काँग्रेस बताउँछ । महाधिवेशन प्रतिनिधिलाई गौशालास्थित अनुपम फुडल्याण्डले खाना खुवाउने छ ।
मंसिर २४ गते उद्घाटन हुने महाधिवेशन मंसिर २८ गतेसम्म प्रत्यक्ष रुपमा चल्नेछ । मतदानमा ढिलाई तथा मत गणनामा समय लागेको खण्डमा पौष महिना छुन पनि सक्नेछ ।
प्रतिनिधिलाई हरेक छाक मासु–भात
एमालेको महाधिवेशनमा खानाको प्रवन्ध कस्तो छ भन्ने जिज्ञासा भए जस्तै अहिले काँग्रेसले आफ्ना प्रतिनिधिलाई खाना खुवाउन गरेको सम्झौतामा के के व्यवस्था गरेको भन्ने जिज्ञासा छ । काँग्रेसले खानाका लागि अनुपम फुडल्याण्डसँग गरेको सम्झौता अनुसार महाधिवेशनमा आउने प्रतिनिधिले ‘मटन करी’देखि ‘स्वीट योगर्ट’सम्म खान पाउने भएका छन् ।
प्रतिनिधिका लागि हरेक दिन बिहान ब्रेक फास्ट, लञ्च (बिहानको खाना) र डिनर (रातिको खाना) को प्रवन्ध काँग्रेसले गरेको छ ।
तर, महाधिवेशनको उद्घाटनका दिन २४ गते भने प्रतिनिधिले बेलुकाको खाना मात्रै पाउने छन् । २४ गते बेलुकाको खानामा जिरा राइस, मटन करी, चिकेन फ्राइ, मिक्स भेज फ्राइ, दाल पञ्चरत्न, साग, सलाद, मिक्स अचार र दही खान दिईनेछ ।
भोपलपल्ट मंसिर २५ गते शनिबारदेखि २७ गते सोमबारसम्म बिहान खाजामा चना, उसिनेको अण्डा, ब्रेड जाम, चिया र कफीको व्यवस्था छ ।
बिहानको खानामा जिरा राइस, चिकेन फ्राइ, फिस फ्राइ, बोडी दाल, भेज करी, साग, सलाद, आँपको अचार र दहीको व्यवस्था हुनेछ भने बेलुकाको खानामा जिरा राइस, मटन करी, चिकेन फ्राइ, मिक्स भेज फ्राइ, दाल पञ्चरत्न, साग, सलाद, मिक्स अचार र दही उपलब्ध हुनेछ ।
कतिले खान्छन् खाना ?
मंसिर २४ गते महाधिवेशन उद्घाटनको दिन बेलुका ६ हजार जनाका लागि खान खुवाउने गरी सम्झौता गरिएको छ । २५ गते बिहान ४५ सय जनालाई खाजा र ६ हजार जनालाई बिहानको खाना खुवाईनेछ । २५ गते बेलुकाको खाना भने ४ हजार जनालाई मात्रै अर्डर गरिएको छ ।
त्यसपछिका दिनमा भने प्रतिनिधि मात्रै भएकाले सोही अनुसार खानाको अर्डर (सम्झौता) गरिएको काँग्रेसले जनाएको छ । महाधिवेशन अवधिभरीका लागि ३६ हजार प्लेट खाना खुवाउने गरी काँग्रेसले अनुपम फुडल्याण्डसँग सम्झौता गरेको हो ।
यसका लागि फुडल्याण्डले सर्भिसमा १७० जना, भान्छामा ७० जना सेफ र सफाइमा ९० जना हरेक दिन कुल ३३० जना कर्मचारी खटाउनेछ ।
.gif)
