आइतबार बेलुका काठमाडौँका २ स्थानमा भएको बम विस्फोटमा ४ जनाको मृत्यु भएको छ भने ७ जना घाइते भएका छन् । घाइते र मृतकहरु विप्लब समुहका कार्यकर्ता रहेको पुष्टि भएको छ । आइतबार बेलुका घट्टेकुलो र शुकेधारामा बम बिस्फोट भएको थियो ।
समुहले सोमबार आह्वान गरेको नेपाल बन्द सफल पार्नको लागि भन्दै बम तयार पारेका थिए । तर बमको टाइमर मिलाउन नजान्दा अघिल्लो दिन नै पड्किएको । प्रहरीका अनुसार उनीहरुले सोमबार बिहान ४:१५ मा पड्किने गरी समय मिलाउन खोजेका थिए । तर एम र पीएम अर्थात बिहान र बेलुकाको समयमा झुक्किदा आफ्नै कोठामा १२ घण्टा अगाडी नै बम पड्किएको हो । उनीहरुले सोमबार बिहान ४:१५ को लागि टाइमर राख्न खोजेको तर झुक्किएर आइतबार बेलुका ४:१५ को टाइम राख्न पुगेको प्रहरी अनुसन्धानले देखाएको छ ।
घट्टेकुलो ४ः१५ मा घरको कोठाभित्र विस्फोट हुँदा विप्लव समूहको विद्यार्थी संगठनका सिटिइभिटी कमिटीका अध्यक्ष प्रज्वल (विशाल) शाहीको मृत्यु भएको छ । शाही बझाङका हुन् । सो कोठामा सँगै रहेका पश्चिम रुकुमको सानीभेरीका रविन केसी घाइते भएका छन् । उनी सो संगठनको त्रिचन्द्र क्याम्पसका इकाइ अध्यक्ष हुन् ।
त्यस्तै करिब ४ः१५ वरिपरि नै सुकेधारास्थित सैलुनभित्र विस्फोट हुँदा तीनजनाको मृत्यु भएको छ भने तीनजना घाइते भएका छन् । विस्फोटको समयमा सैलुनका सञ्चालक छोटेलाल ठाकुरबाहेक नेवाः मुक्तिमोर्चाका केन्द्रीय अध्यक्ष सुरेन्द्र महर्जन, ट्रेड युनियनका अध्यक्ष हरि खड्का, सैन्य विभागका मध्यकमान्ड इन्चार्ज महावीर र अर्का कार्यकर्ता दीपेनलगायत रहेको प्रहरीले जनाएको छ । घाइतेमा एकजना छोटेलाल छन्, मृत्यु क–कसको भयो भन्ने खुलेको छैन ।
