लामो समयदेखि भन्सार एजेन्टको नयाँ लाइसेन्सको परीक्षा रोकिएको छ । अदालतमा रिट निवेदन परेपछि रोकिएको परीक्षा रिट खारेज भईसकेपनि पनि सूचारु हुन सकेन । तर, भन्सार विभागले भने यसलाई प्राथमिकतामै राखिएको बताएको छ ।
२०७७ चैत १६ गते सूचना जारी गरी २०७८ जेठ २२ गतेका लागि तोकिएको भन्सार एजेन्टको लिखित परीक्षा रोकिएको थियो । परीक्षाका लागि मिति तोकिँदा परीक्षा हुने दिनभन्दा न्यूनतम १५ दिन अगाडी अर्को सूचना जारी गरिने विभागले जनाएको छ ।
आँखिर किन भयो ढिला ?
अहिले भन्सार विभागले यसलाई प्राथमिकतामा राखेर काम गरिरहेको विभागका सूचना अधिकारी पुण्यविक्रम खड्का बताउँछन् । उनका अनुसार रिट खारेज भएपछि नै विभागले भन्सार एजेन्टको परीक्षा सम्बन्धि प्रक्रियालाई तीव्रता दिएको छ ।
यस विषयमा विभागका उपमहानिर्देशकको नेतृत्वमा रहने समितिले पनि काम गरिरहेको छ । समितिका संयोजकसमेत रहेका विभागका उपमहानिर्देशक अच्युत सिवाकोटीका अनुसार पाठ्क्रम तर्जुमा, प्रश्नपत्र तयार, प्रश्नपत्र जाँच गर्ने जनशक्ति, परीक्षा केन्द्र तोक्ने, सुरक्षाको प्रवन्ध मिलाउने लगायतका काम अहिले समितिले गरिरहेको छ ।
यसअघिः
भन्सार एजेन्टको लाइसेन्स परीक्षा स्थगित
कति छन् परीक्षार्थी ?
लिखित परीक्षा र अन्तर्वार्तामा पास भएपछि ७ लाख रुपैयाँ धरौटी राखी एजेन्ट लाइसेन्स लिन सकिने प्रावधान छ । विभागले २० वर्षपछि ६६० जना भन्सार एजेन्ट थप गर्न लागेको हो ।
विभागका अनुसार ९ हजार परीक्षार्थी सहभागी हुँदैछन् । यी मध्ये ६६० जनाले मात्रै भन्सार एजेन्टको लाइसेन्स पाउँनेछन् ।
९ हजार परीक्षार्थीका लागि न्यूनतम् ५० वटा परीक्षा केन्द्र आवश्यक देखिएको उपमहानिर्देशक सिवाकोटी बताउँछन् । उनका अनुसार अहिले परीक्षा केन्द्रका लागि काठमाडौँभित्र कलेजहरु भाडामा लिने गरी खोजी कार्य सुरु गरिएको छ ।