नेकपा एमाले लगायतका प्रतिपक्ष दलको अवरोधका कारण बुधबारको व्यवस्थापिका संसद्को बैठक पनि अबरुद्द भएको छ । सरकारले गत मङ्सिर १४ गते नेपालको संविधान संशोधनको लागि व्यवस्थापिका–संसद् सचिवालयमा प्रस्ताव दर्ता गराएसँगै प्रमुख प्रतिपक्ष एमालेलगायतका दलले संसद्को बैठक निरन्तररुपमा अवरोध गर्दै आएका छन् ।
बैठकमा सभामुख ओनसरी घर्तीले नेपाल परिवार दलका सांसद एकनाथ ढकाललाई बोल्न समय प्रदान गरेकी थिइन् । ढकालले सरकारले भाषा, नागरिकतालगायतका विषयमा अघि सारेको संशोधनको प्रस्ताव फिर्ता लिन आग्रह गरे । उनले सरकारले प्रस्तावको औचित्य पुष्टि नसकेको र प्रस्ताव फिर्ता लिएर निर्वाचनको वातावरण नबनाएसम्म अवरोध जारी नै राख्ने बताए । सांसद ढकालले यो प्रस्ताव नेपालीका लागि ल्याएको हो कि विदेशीको हितका लागि ल्याएको भन्दै प्रश्न समेत गरे ।
त्यसपछि प्रतिपक्षी दलका सासदहरुले उठेर विरोध जनाए । पटक पटक आग्रह गर्दा पनि बिपक्षीले अबरोध जारी राखेपछि सभामुखले बैठक स्थगित गरेकी हुन् । संसद्को अर्काे बैठक पुस १४ गते बिहीबार दिनको १ बजे बस्ने छ ।