.gif)
आज आइतबार एक दिवसीय क्रिकेट विश्वकपको फाइनल खेल हुँदै छ । उपाधिको लागि आज आयोजक भारत र अष्ट्रेलिया भिड्ने छन् । फाइनल खेल नेपाली समय अनुसार आइतबार दिउँसो २:१५ बजे सुरु हुने छ । खेल गुजरातको अहमदाबाद स्थित नरेन्द्र मोदी रंगशालामा हुने छ । १ लाख ३० हजार जना क्षमताको यो रंगशाला विश्व कै ठूलो रंगशाला हो ।
आजको फाइनल खेल भारतले जितेमा भारतीय स्टार्टअप कम्पनी एस्ट्रोटल्कले १ अर्ब रुपैयाँ आफ्नो ग्राहकहरुलाई बाड्ने घोषणा गरेको छ। भारतीय संचारमाध्यम एनडीटिभीका अनुसार एस्ट्रोटल्कका सीइओ पुनित गुप्ताले भारतले फाइनल जितेमा एस्ट्रोटल्कका ग्राहकलाई १०० करोड अर्थात् १ अर्ब नगद बाड्ने घोषणा गरेका हुन् । यो रकम एस्ट्रोटल्कका ग्राहकको एस्ट्रोटल्क वालेटमा सिधै पठाइने बताईएको छ ।
इकोनोमिक टाइम्सका अनुसार एस्ट्रोटल्कका ग्राहक करिब ३ करोड छन् भने वार्षिक ६ अर्बको कारोबार गर्ने गरेको छ। कम्पनीले आगामी केहि वर्षमा २० अर्ब आम्दानी लक्ष्य राखेको छ । २० अर्ब आम्दानी लक्ष्य पुरा भएपछि कम्पनीले आईपीओ निष्काशन गर्ने तयारी गरेको छ । एस्ट्रोटल्कले ग्राहकलाई ज्योतिषी समबन्धि परामर्श सेवा प्रदान गर्दछ । ज्योतिषीय सेवा दिन एस्ट्रोटल्कमा १५ हजार ज्योतिष अवाद्द छन् ।
२० वर्षपछि भारत र अष्ट्रेलिया आमनेसामने
आजभन्दा २० वर्ष अघि अर्थात् सन् २००३ को विश्वकप फाइनलमा पनि यी दुई टिम उपाधिको लागि खेलेका थिए । त्यस समय अष्ट्रेलियाले भारतलाई १२५ रनले पराजित गरेर उपाधि जितेको थियो ।
आइतबार मैदान उत्रदा भारत त्यस खेलको बदला लिने लक्ष्यका मैदान उत्रने छ। २००३ को फाइनल खेल खेलेका भारतका राहुल ड्राभिड हाल भारतीय क्रिकेट टिमको मुख्य प्रशिक्षक छन्।
यस अघि भारतले सन् २०११ मा घरेलु भूमि मै श्रीलंकालाई हराएर दोस्रो पटक एक दिवशीय क्रिकेट विश्वकपको उपाधि जितेको थियो । त्यस समय भारतको कप्तान महेन्द्र सिंह धोनी थिए । घरेलु भूमिमा विश्वकप जित्ने पहिलो टिम बनेर बह्रतले इतिहास रचेको थियो ।
अब १२ वर्षपछि भारत फेरी उपाधि जित्ने दाउमा छ । यस पटक भारतीय टिमका कप्तान रोहित शर्मा रहेका छन् । सन् २०११ को विश्वकपको लागि उनी टिम मै परेका थिएनन् । अब भने उनी उपाधिबाट एक खेल मात्र टाढा छन् । भारतले जारी विश्वकपमा कुनै पनि खेल हारेको छैन । भारतले समुह चरणको सबै खेल जितेको थियो भने सेमिफाइनलमा न्युजिल्यान्डलाई पराजित गरेको थियो ।
अष्ट्रेलिया पनि उत्कृष्ट लयमा छ । समुह चरणको सुरुको २ खेल हुँदा अंक तालिकाको पुछारमा रहेको अष्ट्रेलिया त्यसपछिका सबै ८ खेल जित्दै फाइनल पुगेको हो ।
आइतबारको फाइनल भारतले जितेमा यो भारतको तेस्रो उपाधि हुने छ। अष्ट्रेलियाले जितेमा अष्ट्रेलियाको छैठौ उपाधि हुने छ । भारतले १९८३ र २०११ मा विश्वकपको उपाधि जितेको थियो । अष्ट्रेलियाले भने १९८७, १९९९, २००३, २००७ र २०१५ मा उपाधि जितेको थियो । आजको खेल आयोजक भारत र ५ पटक विश्वकपको उपाधि जितेको सर्वाधिक सफल टिम अष्ट्रेलियासँग हो ।
.gif)
