नेपाल स्टक एक्सचेन्ज नेप्सेले नागरिक लगानी कोषको स्टक डिलर कम्पनीलाई आवश्यक पूर्वाधार तयार पार्न निर्दशन दिएको छ । नेप्सेले स्टक डिलर कम्पनीलाई ब्रोकर ब्याक अफिस र डाटा सेन्टर तयार पार्न निर्देशन दिएको कम्पनीका प्रबन्धक निर्देशक इन्द्र कट्टेलले जानकारी दिए ।
स्टक डिलरले शेयर कारोबारको लागि ब्रोकर कोड माग गरेपछि नेप्सेले आवश्यक पूर्वाधार तयार पारेर आउँनको लागि निर्देशन दिएको हो । स्टक डिलरले पनि ब्रोकरको सरह नै आवश्यक पूर्वाधार तयार पार्नु पर्ने हुन्छ ।
स्टक डिलरको क्षेत्रफल कम्तीमा ५०० वर्गफिट हुनुपर्ने, कम्तीमा ५ थान कम्प्यूटर, प्रिण्टर, फ्याक्स तथा टेलिफोन हुनु पर्ने, कम्तीमा स्नातक तह उत्तिर्ण गरेको दुइजना सहित कम्तीमा सात जना कर्मचारी राखेको हुनु पर्ने र संगठन संरचना तथा कार्य विभाजन सम्बन्धी व्यवस्था गरेको हुनु पर्ने छ । त्यस्तै स्टक डिलरले नेप्सेले तोएको मापदण्ड अनुसारको डाटा सेन्टर तयार पार्नु पर्ने छ ।
प्रबन्धक निर्देशक कट्टेलले छिट्टै नै ति पूर्वाधार तयार पारेर नेप्से समक्ष प्रस्तुतिकरण दिने बताए । उनका अनुसार यसै महिना भित्र कारोबार सुरु गर्ने गरी कम्पनीले तयारी गरिरहेको छ ।
कम्पनीले नयाँ बानेश्वरको कृष्णा टावरमा कार्यालय स्थापना गरिसकेको छ ।