.gif)
नेपाल उद्योग वाणिज्य महासंघका अध्यक्ष शेखर गोल्छाले कर बुझाउन जाँदा पनि उल्टै दुःख पाउने देश नेपाल मात्रै बताएका छन् । महासंघले आयोजना गरेको 'साना तथा मझौला उद्यमी सम्मलेन' (एसएमईज सम्मिट) को उद्घाटन समारोहमा बोल्दै अध्यक्ष गोल्छाले यस्तो बताएका हुन् ।
उनले साना मझौला उद्योग व्यवसाय अहिले मारमा परेको भन्दै साना मझौला उद्यमीलाई न्यून ब्याजदरमा कर्जा प्रवाह हुनुपर्ने बताए । उनले प्रश्न गर्दै भने 'ब्याजदरको स्थायित्वको माग गरेर उद्योगी व्यवसायीले के गलत गर्यौ ? परियोजना केन्द्रित लगानी हुनुपर्छ, यसले साना मझौला उद्योगको संख्या बढ्छ र रोजगारी सिर्जना बढ्छ भन्नु गलत हो ? '
इन्धन र कच्चा पदार्थको मूल्य बढेकोले यसले उत्पादन लागत बढेको उनले बताए । साना र मझौला उद्योगलाई प्रवर्द्धन गर्न राजनीतिक तहबाट प्रतिबद्धता आइनसके तर निजी क्षेत्रले यस्तो प्रतिबद्धता आवश्यक रहेको ठानेको उनले उल्लेख गरे ।
उनले स्वदेशी उत्पादन प्रयोग गर्ने कार्यक्रम वर्षैपिच्छे आएपनि कार्यान्वयन नभएको बताए । सरकारको नीति कार्यक्रममा घोषित कार्यक्रम कार्यान्वयन नहुनु दुखद रहेको उनले बताए ।
साना र मझौला उद्योग व्यवसाय मर्कामा पर्दा गत वर्षको ६ महिनाको तुलनामा चालु आर्थिक वर्षको ६ महिनामा राजस्व १५ प्रतिशतले घटेको तथ्यांक उनले प्रस्तुत गरेका छन् । परियोजनामा केन्द्रित लगानी बारे महासंघले अध्ययन गरेर राष्ट्र बैंकमा प्रतिवेदन बुझाएको जानकारी पनि उनले सम्मेलनमा दिएका छन् ।
.gif)
