.gif)
नेपाल उद्योग वाणिज्य महासंघले ब्याजदर वृद्धि र चालू पूँजी कर्जा मार्गदर्शनको विरोधमा आन्दोलनको नेतृत्व गर्न नसकेको भन्दै प्रदेश उद्योग वाणिज्य महासंघका अध्यक्षहरु काठमाडौँमा भेला भएका छन् ।
७ वटै प्रदेश उद्योग वाणिज्य महासंघका अध्यक्षहरुले महासंघका अध्यक्ष शेखर गोल्छालाई भेटेरै बैंक तथा वित्तीय संस्थाले बढाएको ब्याजदर नियन्त्रण र चालू पूँजी कर्जा सम्बन्धि मार्गदर्शन स्थगनको मागमा महासंघले सम्बन्धित निकायमा पहलकदमी नगरेको गुनासो पाखेका छन् । अब पनि मोफसलका व्यसायीका मागबारे बेखबर जस्तै बसे महासंघलाई नै बाहिर राखेर ७ वटै प्रदेश महासंघहरु एकजुट भएर आन्दोलनमा उत्रिने उनीहरुको चेतावनी छ ।
जिल्ला–नगर र प्रदेश उद्योग वाणिज्य संघहरुले दशैँ अगाडीदेखि नै ब्याजदर बढिरहेको विषयमा विरोध जनाइरहेको र दशैँपछि सडकमै विरोध प्रदर्शनमा उत्रिएको भएपनि सबै उद्योगी व्यसायीको छाता संगठनका हैसियतमा महासंघले कुनै निर्णय लिन नसकेको प्रदेश अध्यक्षहरुको आरोप छ ।
प्रदेश महासंघका अध्यक्षसँग केही जिल्ला नगर उद्योग वाणिज्य अध्यक्षहरु पनि टेकु आएका छन् । उनीहरुले महासंघले नेतृत्व लिएर निर्णायक आन्दोलन नगरे जिल्ला नगर र प्रदेश उद्योग वाणिज्य महासंघले मिलेर राष्ट्र बैंक र अर्थ मन्त्रालयविरुद्द आन्दोलन चर्काउने चेतावनी दिएका छन् ।
अध्यक्षले गोल्छाले सरकारसँग वार्ताको माध्यमबाट समस्या समाधानको पहल भइरहेको भन्दै वार्तामार्फत माग सुनुवाई नभए महासंघ आफैँले आन्दोलन आह्वान गर्ने आश्वासन दिएका छन् ।
प्रदेश महासंघका अध्यक्षहरुले संयुक्त रुपमा महासंघका अध्यक्ष गोल्छालाई विज्ञप्ति पनि बुझाएका छन् ।
.gif)
