नेपाल उद्योग वाणिज्य महासंघको प्रदेश अध्यक्षहरुमा वरिष्ठ उपाध्यक्षका उम्मेदवार समर्थित अध्यक्षहरु सर्वसम्मत निर्वाचित भएका छन् । बिहीसम्म ७ वटै प्रदेशको नेतत्व चयन हुँदा सबै प्रदेशमा उमेशलाल समर्थित व्यक्तिहरु प्रदेश अध्यक्षमा चयन भएका छन् ।
सुरुमा कर्णाली प्रदेशमा पदमबहादूर शाही सर्वसम्मत रुपमा अध्यक्ष भएका थिए भने लुम्बिनी प्रदेशमा कृष्णप्रसाद शर्मा सर्वसम्मत अध्यक्षमा चयन भएका थिए ।
उमेशलाल समूहबाटै वागमती प्रदेशमा दिलसुन्दर श्रेष्ठ सर्वसम्मत अध्यक्ष चयन हुँदा सुदूर पश्चिम प्रदेशमा शंकर बोगटी सर्वसम्मत रुपमा अध्यक्षमा चयन भएका छन् । महासंघको मधेश प्रदेशमा पनि उमेश समूहकै अशोक टेमानी अध्यक्षमा सर्वसम्मत चयन भएका थिए ।
यसैगरी गण्डकी प्रदेशमा पनि गोलाप्रथाबाट उमेशलाल श्रेष्ठ समूहकै अमृत भट्टचन अध्यक्षमा निर्वाचित भएका छन् ।
कोशी प्रदेशमा बिहिबार मात्रै उमेशलाल समर्थित राजेन्द्र राउत सर्वसम्मत निर्वाचित भएका छन् ।
महासंघको प्रदेश अधिवेशनमा ७ वटा प्रदेशमा उमेश र दिनेश श्रेष्ठ समूहले अध्यक्षमा उम्मेदवारी उठाउँदा वरिष्ठ उपाध्यक्षमा अन्य प्रत्यासीले भने आआफ्नो तर्फबाट उम्मेदावर उठाउन सकेका थिएनन् ।
वरिष्ठ उपाध्यक्षमा आफ्नो दावेदारी प्रस्तुत गर्दै आएका हालका जिल्ला नगर उपाध्यक्ष दिनेश श्रेष्ठले वरिष्ठमा उमेशलाल श्रेष्ठलाई समर्थन गर्दै आफु पुनः उपाध्यक्षमै उठ्ने घोषणा गरिसकेका छन् ।
‘व्यवसायीका हरेक समस्यामा साथ दिने भएकाले पनि जिल्लार नगरमा दिनेश दाईको राम्रो प्रभाव रहेको छ,’ एक जिल्ला नगर अध्यक्षले भने, ‘उमेश दाई र दिनेश दाई मिलेर एउटै टीम भएपछि मतका आधारमा जिल्ला नगर सबैभन्दा बलियो बनेको छ ।’
विशेषगरी जिल्ला नगरमा महासंघको प्रदेश अध्यक्षहरुको ठूलो भूमीका हुने भएकाले सबै प्रदेशमा उमेश समूहका अध्यक्षहरु चयन हुँदा त्यसले आगामी दिनमा हुने महासंघको निर्वाचनमा वरिष्ठ उपाध्यक्षमा उमेशलाल श्रेष्ठको पकड राम्रो हुने सम्बद्ध जिल्ला अध्यक्षहरु नै बताउँछन् । ‘अहिले महासंघ अन्तरगत प्रदेशको निर्वाचत हेर्दा उमेशलाल श्रेष्ठको ठूलो प्रभाव रहेको देखिएको छ,’ एक जिल्ला अध्यक्षले भने, ‘वरिष्ठ उपाध्यक्षका अन्य प्रत्यासीले उमेशलाल श्रेष्ठको समूहको विरुद्ध आफ्नो अध्यक्ष उठाउन नसक्नु नै उनीहरु जिल्ला नगरमा कमजोर रहेको देखाउँछ ।’